विद्यार्थ्यांना शैक्षणिक वर्षाच्या पहिल्याच दिवसापासून दर्जेदार शिक्षणासाठी आवश्यक शैक्षणिक साहित्य उपलब्ध व्हावे आणि अभ्यासक्रमाच्या अध्यापनास वेळेत सुरुवात व्हावी, या उद्देशाने अमरावती महानगरपालिका शिक्षण विभागाच्या वतीने शैक्षणिक सत्र २०२६-२७ करिता मोफत पाठ्यपुस्तक वितरण कार्यक्रमाचा शुभारंभ आज उत्साहपूर्ण वातावरणात करण्यात आला.
या उपक्रमामुळे महानगरपालिका क्षेत्रातील तब्बल ५० हजार १९१ विद्यार्थ्यांना शैक्षणिक वर्षाच्या प्रारंभीच मोफत पाठ्यपुस्तकांचा लाभ मिळणार आहे.
अमरावती महानगरपालिका क्षेत्रामध्ये शासकीय, जिल्हा परिषद, महानगरपालिका तसेच खाजगी अनुदानित व्यवस्थापनाच्या मराठी, हिंदी, इंग्रजी आणि उर्दू माध्यमाच्या एकूण २१० कार्यरत शाळा आहेत. या शाळांमध्ये शिकणाऱ्या सर्व विद्यार्थ्यांसाठी समग्र शिक्षा अभियानांतर्गत राज्य शासनामार्फत मोफत पाठ्यपुस्तकांचा पुरवठा करण्यात येतो.
यंदाही विद्यार्थ्यांना शाळेच्या पहिल्याच दिवशी पाठ्यपुस्तके उपलब्ध करून देण्याचे उद्दिष्ट ठेवून शिक्षण विभागाने व्यापक नियोजन केले आहे.
या पाठ्यपुस्तक वितरण कार्यक्रमाचा शुभारंभ अमरावती महानगरपालिका आयुक्त वर्षा लड्डा (भा.प्र.से.) यांच्या हस्ते करण्यात आला.
यावेळी शिक्षण विभागातील अधिकारी व कर्मचारी उपस्थित होते. विद्यार्थ्यांना वेळेत पाठ्यपुस्तके उपलब्ध होणे ही शिक्षण व्यवस्थेतील महत्त्वाची बाब असून त्यामुळे विद्यार्थ्यांचा अभ्यासक्रम सुरुवातीपासूनच नियमितपणे सुरू राहण्यास मदत होणार असल्याचे यावेळी सांगण्यात आले.
पाठ्यपुस्तक वितरणासाठी ८ जून ते ११ जून २०२६ या कालावधीत विशेष नियोजन करण्यात आले आहे. मनपा मराठी शाळा क्रमांक १३, चपराशीपुरा तसेच मनपा उर्दू शाळा क्रमांक ६, चपराशीपुरा या केंद्रांवरून विविध माध्यमांच्या शाळांना पाठ्यपुस्तकांचे वितरण केले जाणार आहे.
या चार दिवसांच्या कालावधीत संबंधित शाळांच्या प्रतिनिधींना त्यांच्या विद्यार्थ्यांच्या संख्येनुसार पाठ्यपुस्तकांचे संच वितरित करण्यात येणार आहेत.
महानगरपालिका शिक्षण विभागाने संपूर्ण वितरण प्रक्रियेचे बारकाईने नियोजन केले असून शाळानिहाय, माध्यमनिहाय आणि वर्गनिहाय पाठ्यपुस्तकांचे वर्गीकरण करण्यात आले आहे.
वितरण प्रक्रियेत कोणतीही अडचण निर्माण होऊ नये यासाठी स्वतंत्र अधिकारी व कर्मचाऱ्यांची नियुक्ती करण्यात आली आहे. तसेच प्रत्येक शाळेला आवश्यक तेवढी पाठ्यपुस्तके वेळेत उपलब्ध करून देण्यासाठी विशेष खबरदारी घेण्यात येत आहे.
या उपक्रमाचे मार्गदर्शन अमरावती महानगरपालिकेचे उपायुक्त नरेंद्र वानखडे आणि शिक्षणाधिकारी डॉ. प्रकाश मेश्राम करीत असून त्यांच्या नेतृत्वाखाली वितरणाचे काम वेगाने सुरू करण्यात आले आहे.
पाठ्यपुस्तक वितरणाची जबाबदारी सहाय्यक कार्यक्रम अधिकारी पंकजकुमार सपकाळ, संजय बेलसरे, सर्व विषय साधन व्यक्ती, विशेष शिक्षक तसेच क्रीडा शिक्षक यांच्यावर सोपविण्यात आली आहे.
उर्दू माध्यमाच्या शाळांसाठी पाठ्यपुस्तक वितरणाची स्वतंत्र व्यवस्था करण्यात आली असून त्याची जबाबदारी शाळा निरीक्षक वहीद खान, मोहम्मद जावेद, काझी निजामुद्दीन, मोहम्मद इमरान नबी आणि नासीर हुसेन यांच्याकडे देण्यात आली आहे.
तसेच हिंदी माध्यमाच्या पाठ्यपुस्तक वितरणासाठी केंद्र समन्वयक गोपाल कांबळे आणि कृष्णा ठाकूर यांची नियुक्ती करण्यात आली आहे. संबंधित अधिकारी व कर्मचारी वितरण प्रक्रिया सुरळीत आणि पारदर्शक पद्धतीने पार पाडण्यासाठी प्रयत्नशील आहेत.
समग्र शिक्षा अभियानांतर्गत राबविण्यात येणारा हा उपक्रम विद्यार्थ्यांच्या शैक्षणिक प्रगतीसाठी महत्त्वाचा मानला जातो. आर्थिकदृष्ट्या दुर्बल कुटुंबांतील विद्यार्थ्यांनाही आवश्यक पाठ्यपुस्तके विनामूल्य उपलब्ध होत असल्याने त्यांच्या शिक्षणाचा आर्थिक भार कमी होतो.
तसेच सर्व विद्यार्थ्यांना समान संधी उपलब्ध करून देण्याच्या दृष्टीने हा उपक्रम प्रभावी ठरत आहे.
शैक्षणिक वर्षाच्या सुरुवातीलाच विद्यार्थ्यांच्या हाती पाठ्यपुस्तके पोहोचल्यामुळे अध्यापन कार्यात सातत्य राहणार असून गुणवत्तापूर्ण शिक्षणाच्या दिशेने हा महत्त्वाचा टप्पा ठरणार आहे.