अमरावती शहरातील स्वच्छता व्यवस्थेला अधिक गती देण्यासाठी महानगरपालिका प्रशासनाकडून राबविण्यात येत असलेल्या उपक्रमांच्या अनुषंगाने आयुक्त सौम्या शर्मा चांडक यांनी ९ डिसेंबर २०२५ रोजी नवसारी परिसर, वाघमारे चौक आणि ट्रान्सपोर्ट नगर या भागातील कचरा संकलन आणि विल्हेवाट यंत्रणेची व्यापक पाहणी केली.
शहरातील वाढत्या कचरा निर्मितीच्या पार्श्वभूमीवर प्रत्यक्ष परिस्थितीचा आढावा घेऊन आवश्यक सुधारणा उपायांची दिशा ठरवण्याचा हा उपक्रम महत्त्वपूर्ण ठरला.
पाहणीदरम्यान आयुक्तांनी कोणार्क कंपनीद्वारे करण्यात येणाऱ्या कचरा उचल व विल्हेवाट प्रक्रियेचे प्रत्यक्ष निरीक्षण केले. कचरा संकलनासाठी वापरल्या जाणाऱ्या यंत्रसामग्रीची कार्यक्षमता, परिसरातील स्वच्छता, कचरा वर्गीकरणाची अंमलबजावणी आणि नागरिकांसाठी उपलब्ध सुविधा यांचे त्यांनी सखोल परीक्षण केले.
स्वच्छता व्यवस्था अधिक सक्षम आणि नियोजनबद्ध करण्यासाठी कोणत्या सुधारणा आवश्यक आहेत, याचा त्यांनी अभ्यास केला.
यावेळी आयुक्तांनी स्वच्छता विभागाचे अधिकारी, कर्मचारी आणि कंत्राटदार कंपनीच्या प्रतिनिधींशी चर्चा करून संबंधित भागातील नियमित, वेळेवर आणि वैज्ञानिक पद्धतीने कचरा विल्हेवाट सुनिश्चित करण्याचे स्पष्ट निर्देश दिले.
कचरा संकलनात होणारा विलंब कमी करण्यासाठी आवश्यक मनुष्यबळ, यंत्रसामग्री आणि व्यवस्थापन अधिक प्रभावी करण्यावर त्यांनी भर दिला.
आयुक्त सौम्या शर्मा चांडक यांनी सांगितले की, शहरातील वाढती लोकसंख्या, व्यापारी घनता आणि दैनंदिन कचरा निर्मिती पाहता स्वच्छता यंत्रणा अद्ययावत ठेवणे अत्यावश्यक आहे. नागरिकांची स्वच्छतेविषयी जागरूकता व सहकार्य शहर स्वच्छ ठेवण्यासाठी अत्यंत महत्त्वाचे असल्याचे त्यांनी नमूद केले.
तसेच, दैनंदिन साफसफाई कंत्राटदाराचे काम समाधानकारक नसल्यामुळे त्यांना ३४ ते ३५ कारणे दाखवा नोटिसा देण्यात आल्या असून, आवश्यक सुधारणा न झाल्याने त्यांच्या सुनावणीही घेण्यात आलेली आहे. पुढील कामकाजात दर्जात्मक सुधारणा करण्याचे निर्देश मा. आयुक्तांनी दिले.
अमरावती शहराला ‘स्वच्छ अमरावती’ बनविण्याच्या उद्दिष्टाने महानगरपालिका प्रशासन सातत्याने प्रयत्नशील राहील, असा विश्वास आयुक्त सौम्या शर्मा चांडक यांनी व्यक्त केला.