अमरावती महानगरपालिकेच्या आयुक्त वर्षा लड्डा यांच्या पुढाकाराने आणि मार्गदर्शनाखाली मंगळवार, दि. २ जून २०२६ रोजी सकाळी ११.०० वाजता कार्यालयीन कार्यपद्धती विषयक विशेष प्रशिक्षण कार्यक्रम आयोजित करण्यात आला.
महानगरपालिका प्रशासनातील कामकाज अधिक सुसूत्र, पारदर्शक आणि गतिमान करण्याच्या उद्देशाने आयोजित करण्यात आलेले हे प्रशिक्षण विश्वरत्न डॉ. बाबासाहेब आंबेडकर सभागृह येथे पार पडले.
प्रशिक्षण कार्यक्रमात महानगरपालिकेतील विविध विभागांचे अधिकारी, कर्मचारी आणि प्रशासकीय कामकाजाशी संबंधित कर्मचारी मोठ्या संख्येने उपस्थित होते.
शासकीय कार्यालयांमध्ये दैनंदिन कामकाज करताना आवश्यक असलेल्या विविध नियमावली, प्रशासकीय प्रक्रिया, फाईल हाताळणी, पत्रव्यवहार, नोंद व्यवस्थापन, सेवा वितरण आणि वेळेचे व्यवस्थापन यांसारख्या महत्त्वपूर्ण विषयांवर सविस्तर मार्गदर्शन करण्यात आले.
यावेळी आयुक्त वर्षा लड्डा यांनी उपस्थितांना संबोधित करताना सांगितले की, नागरिकांना दर्जेदार आणि वेळेत सेवा उपलब्ध करून देणे ही प्रशासनाची प्राथमिक जबाबदारी आहे. त्यासाठी प्रत्येक अधिकारी आणि कर्मचाऱ्याने आपल्या कामकाजात शिस्त, जबाबदारी, पारदर्शकता आणि सकारात्मक दृष्टिकोन ठेवणे आवश्यक आहे.
प्रशासनातील कार्यपद्धती अधिक परिणामकारक करण्यासाठी अद्ययावत नियमांची माहिती असणे तसेच त्यांची अंमलबजावणी काटेकोरपणे करणे गरजेचे असल्याचे त्यांनी नमूद केले.
प्रशिक्षणादरम्यान कार्यालयीन कामकाजातील विविध टप्प्यांचे सादरीकरण करण्यात आले. फाईल प्रस्ताव तयार करण्याची पद्धत, निर्णय प्रक्रियेतील आवश्यक बाबी, शासन निर्णयांचे पालन, अभिलेख व्यवस्थापन, ई-ऑफिस प्रणालीचा प्रभावी वापर, नागरिकांच्या तक्रारींचे तत्पर निवारण आणि विविध विभागांमधील समन्वय याविषयी सखोल माहिती देण्यात आली. तसेच कार्यालयीन कामकाजातील त्रुटी टाळण्यासाठी कोणत्या बाबींकडे विशेष लक्ष देणे आवश्यक आहे, याबाबतही मार्गदर्शन करण्यात आले.
आयुक्तांनी कर्मचारी आणि अधिकाऱ्यांना नागरिकाभिमुख प्रशासनाची संकल्पना अधिक प्रभावीपणे राबविण्याचे आवाहन केले. नागरिकांच्या समस्या वेळेत सोडविणे, त्यांच्याशी सुसंवाद राखणे आणि शासकीय योजनांचा लाभ पात्र लाभार्थ्यांपर्यंत पोहोचविणे यासाठी प्रशासनाने संवेदनशीलतेने कार्य करणे आवश्यक असल्याचे त्यांनी सांगितले.
कार्यक्रमात उपस्थित कर्मचाऱ्यांनी प्रशिक्षणादरम्यान विविध प्रशासकीय विषयांवरील प्रश्न उपस्थित केले. त्यावर वरिष्ठ अधिकाऱ्यांकडून सविस्तर उत्तरे देण्यात आली. त्यामुळे अनेक शंकांचे निरसन होऊन कार्यालयीन कामकाज अधिक प्रभावीपणे पार पाडण्यासाठी कर्मचाऱ्यांना आवश्यक मार्गदर्शन मिळाले.
या प्रशिक्षणात अतिरिक्त आयुक्त महेश देशमुख, अतिरिक्त आयुक्त शिल्पा नाईक, उपायुक्त नरेंद्र वानखडे, उपायुक्त योगेश पिठे, अधिकारी वर्ग तसेच कर्मचारी मोठ्या संख्येने उपस्थित होते.