मौजा जेवड येथील सर्व्हे क्रमांक २७/२ मधील श्रीकृष्ण मंदिरालगतच्या जागेवरील अनधिकृत अतिक्रमण हटविण्याच्या दृष्टीने महानगरपालिका प्रशासनाने निर्णायक पाऊल उचलले आहे.
यापूर्वी संबंधित अतिक्रमणधारकांना जागा रिकामी करण्याबाबत सूचना व निर्देश देण्यात आले होते.
त्यानंतरही अतिक्रमण कायम असल्याने आज, गुरुवार (दि. २ जुलै २०२६) रोजी वरिष्ठ पदाधिकाऱ्यांसह प्रशासकीय अधिकाऱ्यांनी घटनास्थळी संयुक्त पाहणी करून पुढील कायदेशीर कारवाईला गती देण्याचे निर्देश दिले.
महापौर श्रीचंद तेजवानी यांच्या प्रमुख उपस्थितीत महानगरपालिका आयुक्त वर्षा लड्डा, गटनेते डॉ. राजेंद्र तायडे, नगरसेविका सुमती ढोके, नगरसेवक संजय गव्हाणे, मंगेश खोंडे, अतिरिक्त आयुक्त शिल्पा नाईक, उपायुक्त नरेंद्र वानखडे, उपायुक्त योगेश पिठे, सहाय्यक आयुक्त धनंजय शिंदे, अविनाश रघटाटे, वैद्यकीय अधिकारी (स्वच्छता) डॉ. अजय जाधव, उपअभियंता हेमंत महाजन, अभियंता श्रीरंग तायडे यांनी संबंधित जागेची प्रत्यक्ष पाहणी केली.
संयुक्त पाहणीदरम्यान अधिकाऱ्यांनी अतिक्रमित जागेची स्थिती, बांधकामाचे स्वरूप आणि जागेच्या मालकीसंदर्भातील उपलब्ध अभिलेखांची माहिती घेतली.
तसेच, संबंधित बांधकामाचे अचूक मोजमाप करून सीमांकन करण्याच्या सूचना महसूल व अभियांत्रिकी विभागाच्या अधिकाऱ्यांना देण्यात आल्या.
सीमांकन अहवाल प्राप्त झाल्यानंतर नियमांनुसार अतिक्रमण हटविण्याची कारवाई तातडीने करण्यात यावी, असे स्पष्ट निर्देश यावेळी देण्यात आले.
महानगरपालिका प्रशासनाने यापूर्वीही संबंधितांना अतिक्रमण स्वखर्चाने हटविण्याची संधी दिली होती.
मात्र, त्यानंतरही कोणतीही कार्यवाही न झाल्यामुळे महानगरपालिकेला प्रत्यक्ष कारवाईची प्रक्रिया सुरू करावी लागत असल्याचे अधिकाऱ्यांनी सांगितले.
सार्वजनिक तसेच शासकीय जागांवरील अनधिकृत अतिक्रमण कोणत्याही परिस्थितीत सहन केले जाणार नाही, असा स्पष्ट संदेश यावेळी महानगरपालिका प्रशासनाने दिला.
श्रीकृष्ण मंदिर परिसरात भाविकांची मोठ्या प्रमाणात वर्दळ असते. मंदिरालगत झालेल्या अतिक्रमणामुळे नागरिकांच्या ये-जा करण्यास अडथळे निर्माण होत असल्याच्या तक्रारी महानगरपालिका प्रशासनाकडे प्राप्त झाल्या होत्या.
या पार्श्वभूमीवर मंदिर परिसर अतिक्रमणमुक्त करून नागरिकांना सुरक्षित व मोकळी जागा उपलब्ध करून देण्याच्या दृष्टीने ही कारवाई महत्त्वाची मानली जात आहे.
महानगरपालिका प्रशासनाने संबंधित विभागांना सर्व आवश्यक प्रक्रिया पूर्ण करून कायदेशीर तरतुदीनुसार पुढील कारवाई करण्याचे आदेश दिले आहेत.
सीमांकन व मोजमाप पूर्ण झाल्यानंतर अतिक्रमण हटविण्याची मोहीम राबविण्यात येणार असून, शहरातील इतर शासकीय व सार्वजनिक जागांवरील अनधिकृत अतिक्रमणांवरही अशाच प्रकारे कठोर कारवाई करण्यात येईल, असे महानगरपालिका प्रशासनाकडून स्पष्ट करण्यात आले.