अमरावती महानगरपालिका आयुक्त डॉ. मंगेश गोंदावले यांनी आज मंगळवार (दि. ४ ऑगस्ट) महानगरपालिकेच्या मालमत्ता कर विभागाच्या कामकाजाचा सविस्तर आढावा घेतला.
या बैठकीत चालू आर्थिक वर्षातील मालमत्ता कर वसुलीची सद्यस्थिती, विभागनिहाय उद्दिष्टपूर्ती, प्रलंबित थकबाकी, मोठ्या करदात्यांकडील वसुली, कर संकलनातील अडचणी तसेच महसूल वाढीसाठी राबविण्यात येणाऱ्या उपाययोजनांवर सखोल चर्चा करण्यात आली.
बैठकीत आयुक्त डॉ. मंगेश गोंदावले यांनी मालमत्ता कर हा महापालिकेच्या महसुलाचा प्रमुख स्रोत असल्याचे सांगत, निर्धारित उद्दिष्ट वेळेत पूर्ण करण्यासाठी सर्व संबंधित अधिकाऱ्यांनी नियोजनबद्ध आणि परिणामकारक पद्धतीने काम करण्याचे निर्देश दिले.
प्रत्येक विभागाने दैनंदिन व साप्ताहिक वसुलीचे उद्दिष्ट निश्चित करून त्याचा नियमित आढावा घ्यावा, तसेच प्रत्येक अधिकाऱ्याने आपल्या कार्यक्षेत्रातील प्रलंबित कर वसुलीकडे विशेष लक्ष द्यावे, असे त्यांनी स्पष्ट केले.
मोठ्या थकबाकीदारांकडून कर वसुलीसाठी विशेष मोहीम राबविण्याच्या सूचना देताना आयुक्तांनी संबंधितांना प्रत्यक्ष भेटी घेणे, नोटिसा बजावणे, नियमित पाठपुरावा करणे आणि आवश्यकतेनुसार महानगरपालिका अधिनियमातील तरतुदींनुसार कारवाई करण्याचे निर्देश दिले.
ज्या प्रकरणांमध्ये दीर्घकाळापासून थकबाकी आहे, त्यांची स्वतंत्र यादी तयार करून प्राधान्याने वसुली करावी, असेही त्यांनी सांगितले.
नागरिकांना कर भरणे अधिक सुलभ व्हावे यासाठी ऑनलाइन सुविधांचा अधिकाधिक प्रचार करावा, विविध माध्यमांतून जनजागृती करावी आणि करदात्यांच्या अडचणींचे तातडीने निराकरण करावे, असे निर्देशही त्यांनी दिले.
कर भरण्यासाठी नागरिकांना सकारात्मक प्रतिसाद मिळेल, अशा प्रकारे संवाद वाढविण्याची आवश्यकता त्यांनी अधोरेखित केली.
बैठकीत विभागातील अधिकाऱ्यांनी विभागनिहाय कर वसुलीचा आढावा, प्रलंबित प्रकरणे, मागील वर्षाच्या तुलनेतील प्रगती, महसूल वाढीसाठी आखलेले नियोजन आणि येणाऱ्या अडचणी याबाबत सादरीकरण केले.
विविध विभागांतील कामगिरीचा तुलनात्मक आढावा घेत आयुक्तांनी अपेक्षित प्रगती न झालेल्या क्षेत्रांमध्ये विशेष लक्ष देण्याच्या सूचना दिल्या.
तसेच, मालमत्ता कराच्या नोंदी अद्ययावत ठेवणे, नव्याने बांधलेल्या मालमत्तांचा कर आकारणी प्रक्रियेत समावेश करणे, मालमत्तांची माहिती डिजिटल स्वरूपात अद्ययावत करणे आणि महसूल वाढीसाठी उपलब्ध सर्व पर्यायांचा प्रभावी वापर करण्याबाबतही बैठकीत चर्चा झाली.
बैठकीच्या शेवटी आयुक्त डॉ. मंगेश गोंदावले यांनी सर्व अधिकारी आणि कर्मचाऱ्यांनी समन्वयाने काम करून मालमत्ता कर वसुलीचे निर्धारित उद्दिष्ट वेळेत पूर्ण करण्यासाठी विशेष प्रयत्न करावेत, असे आवाहन केले.
महसूल वाढल्यास शहरातील पायाभूत सुविधा, स्वच्छता, रस्ते, पाणीपुरवठा आणि इतर नागरी सेवांच्या विकासकामांना अधिक गती देता येईल, यासाठी मालमत्ता कर वसुली अत्यंत महत्त्वाची असल्याचे त्यांनी यावेळी नमूद केले.
या बैठकीत अतिरिक्त आयुक्त महेश देशमुख, उपायुक्त भाग्यश्री बोरेकर, मुख्यलेखाधिकारी शिल्पा पवार, सहाय्यक संचालक नगर रचना अधिकारी वैशाली गाठे, सहाय्यक आयुक्त नंदकिशोर तिखिले, भुषण पुसतकर, नितीन बोबडे, धनंजय शिंदे, मनोज शहाळे, सहाय्यक क्षेत्रीय अधिकारी नर्मदा चव्हाण, प्रविण ठाकरे, अतिक्रमण पथक प्रमुख अजय बन्सेले, हरीष संतोसिया, मनपा कर्मचारी उपस्थित होते.