आगामी २५ सप्टेंबर रोजी होणाऱ्या गणेश विसर्जनाच्या पार्श्वभूमीवर अमरावती महानगरपालिकेने तयारीला वेग दिला आहे.
गणेश विसर्जनासाठी शहरातील प्रमुख विसर्जनस्थळांवर भाविकांची मोठ्या प्रमाणात गर्दी होणार असल्याने स्वच्छता, सुरक्षा, वाहतूक, प्रकाश व्यवस्था, अग्निशमन, सीसीटीव्ही, पार्किंग तसेच नागरिकांच्या मूलभूत सुविधांच्या दृष्टीने योग्य नियोजन करण्यासाठी मनपा प्रशासनाकडून विविध उपाययोजना करण्यात येत आहेत.
याच अनुषंगाने मनपा आयुक्त डॉ. मंगेश गोंदावले यांनी आज बुधवार, दि. ९ सप्टेंबर रोजी छत्री तलाव व प्रथमेश तलावाची प्रत्यक्ष पाहणी करून संबंधित अधिकाऱ्यांकडून तयारीचा आढावा घेतला.
यावेळी पूर्व झोन क्र. ३ चे सहाय्यक आयुक्त नितीन बोबडे यांनी गणेश विसर्जनासाठी करण्यात येत असलेल्या नियोजनाची सविस्तर माहिती आयुक्तांना दिली.
यंदा गणेश विसर्जनाचा कार्यक्रम पाच दिवस चालणार असल्याने या कालावधीत विसर्जनस्थळी भाविकांची होणारी गर्दी, वाहनांची संख्या आणि सुरक्षेची आवश्यकता लक्षात घेऊन सर्व विभागांनी परस्पर समन्वयाने काम करण्याच्या सूचना आयुक्तांनी दिल्या.
गणेश विसर्जनासाठी येणाऱ्या नागरिकांना कोणत्याही प्रकारची गैरसोय होऊ नये, यासाठी विसर्जनस्थळी आवश्यक त्या सर्व सुविधा उपलब्ध करून देण्याचे निर्देश आयुक्त डॉ. मंगेश गोंदावले यांनी दिले.
यामध्ये स्टेजची उभारणी, मोबाईल टॉयलेटची व्यवस्था, स्वच्छता व्यवस्था, पार्किंगची सुविधा, सीसीटीव्ही कॅमेरे, अग्निशमन यंत्रणा तसेच परिसरातील अतिक्रमण हटविणे आदी बाबींचा समावेश आहे.
विसर्जनस्थळी मोठ्या प्रमाणावर नागरिकांची गर्दी होत असल्याने सुरक्षेच्या दृष्टीने सीसीटीव्ही कॅमेऱ्यांची योग्य ठिकाणी उभारणी करण्याचे निर्देश देण्यात आले.
तसेच विसर्जनाच्या ठिकाणी अग्निशमन विभागाची आवश्यक यंत्रणा व मनुष्यबळ सज्ज ठेवण्याच्या सूचनाही करण्यात आल्या.
गणेश विसर्जनस्थळापासून दस्तुरनगर चौकापर्यंत प्रकाश व्यवस्था सक्षम करण्याचे निर्देश आयुक्तांनी विद्युत विभागाला दिले.
विसर्जनासाठी येणाऱ्या नागरिकांच्या सुरक्षिततेच्या दृष्टीने या मार्गावर आवश्यक त्या ठिकाणी कॅमेरे बसविण्याचेही निर्देश देण्यात आले.
विसर्जनाच्या काळात रात्रीच्या वेळीही मोठ्या प्रमाणात भाविकांची व वाहनांची वर्दळ राहणार असल्याने रस्त्यांवर पुरेसा प्रकाश असणे आवश्यक आहे.
त्यामुळे प्रकाश व्यवस्थेची पाहणी करून आवश्यक त्या ठिकाणी अतिरिक्त दिवे लावण्याचे निर्देश देण्यात आले.
विसर्जनाच्या पार्श्वभूमीवर शहरातील प्रमुख मार्गांची दुरुस्ती करण्यावरही आयुक्तांनी भर दिला. दस्तुरनगर चौक ते राजापेठपर्यंतच्या रस्त्यावर आवश्यक त्या ठिकाणी पॅचेस करण्याचे निर्देश संबंधित विभागाला देण्यात आले.
गणेश विसर्जनासाठी मोठ्या प्रमाणात वाहतूक होणार असल्याने रस्त्यांवरील खड्डे व खराब झालेली ठिकाणे वेळेत दुरुस्त करून वाहतुकीस अडथळा निर्माण होणार नाही, याची दक्षता घेण्याच्या सूचना करण्यात आल्या.
विसर्जन मार्गावर तसेच तलाव परिसरात नागरिकांची व वाहनांची गर्दी लक्षात घेता वाहतुकीला अडथळा ठरणारे अतिक्रमण तातडीने हटविण्याच्या सूचना अतिक्रमण विभागाला देण्यात आल्या.
विसर्जनाच्या काळात भाविकांना सुरक्षितपणे ये-जा करता यावी आणि वाहतुकीची कोंडी टाळता यावी, यासाठी मार्ग मोकळा ठेवण्याच्या दृष्टीने नियोजन करण्याचे निर्देश देण्यात आले.
गणेश विसर्जनाच्या पाच दिवसांच्या कालावधीत तलाव परिसरात मोठ्या प्रमाणात नागरिकांची गर्दी होणार असल्याने स्वच्छता व आरोग्य व्यवस्थेवर विशेष लक्ष देण्याच्या सूचना करण्यात आल्या.
मोबाईल टॉयलेटची व्यवस्था, नियमित साफसफाई, कचरा संकलन तसेच विसर्जनस्थळाचा परिसर स्वच्छ ठेवण्यासाठी आवश्यक मनुष्यबळ उपलब्ध करून देण्याचे निर्देश संबंधित अधिकाऱ्यांना देण्यात आले.
तसेच भाविकांची वाढती गर्दी लक्षात घेऊन आरोग्यविषयक कोणतीही समस्या उद्भवल्यास तत्काळ मदत मिळावी, यासाठी संबंधित यंत्रणांनी आवश्यक तयारी ठेवावी, अशा सूचनाही देण्यात आल्या.